M'arregordu ca in su 1970 si disputesit su Campionau Mondiali de su Futbol, in Messico. In sa squadra de s'Italia giògada intzarasa mitadi de su Casteddu e Gigi Riva potàda sa maglia n. 11.
Deu a Riva, d'hia biu gioghendi a su stadiu Amsicora, innui mi bitìada fradi miu Marinu, su spacciau, ca mi obìada su beni de su mundu e m'arregolliada a mari cun amigus e a baddai, in giru po is clebbixeddusu da sa provincia, anca sonànta is cumplessinusu e si cuccàda (fradi miu m'hiada contzillau de istringi is pivellasa, ballendi i lentusu, ch'intzarasa fianta "Senza luce", "L'ora dell'amore", "Child in time" e atrus ancora, poita a is feminasa praxiada aici).
A s'hora deu tenìa sexannusu. Ma femu contendi de Gigi Riva e de su stadiu Amsicora.
A su dominigu, candu giogàda su Casteddu si patìada de bidda a facc'e' sa una e mesu(ma de sa provincia de Nugoro e de Tathari patianta ammengianeddu chitzi, cun su proceddu arrostiu, su casu marzu e su binu nieddu in sa betua), po essi ingunisi a is duasa, duasa e mesu. Sa partida inghitzada a is tres oras.
M'arregordu candu ci fiada una punitzioni, fintzasa a trinta, cuaranta metrusu de sa porta avversaria. Gigi Riva si piatzàda su palloni; calàda unu silentziu in totu su stadiu.
Gigi pigàda sa mira e apustis s'affraccada; fiada cumenti chi totus is animas casteddaias e sardas presentisi spingessinti cun sa fortza de sa voluntadi insoru, sa boccia chi Gigi Riva hiada piatzau; su portieri e is terzinus de sa barriera si tremianta i' mudandads; sa castangia de Gigi Riva fìada u razzu capassi de segai una camba, sfundai is pitturras o de sfasciai sa conca de un homini. E candu sa boccia intrada in sa porta, sbentiendi a sa reccia, unu tzerriu si pesàda fintzasa a ceu! Gigi Riva parteneciada a ingui, a su xeu, fiada u deusu de su palloni cabau in terra po s'arrescatu e sa gloria de is Sardus e de su Casteddu!
Po meritu de Riva (e de Rivera, chi di ponìada sa boccia in conca e in su pei mancinu) s'Italia lompesit a sa finali, apustis de binci s'epica batalla cun sa Germania: 4 a 3 me is supplementaris!
Ma sa finali fu trista: sa copa Rimet da bincesit su Brasili.Nosu tenestusu unu deusu de su palloni, ma cussusu ndi tenianta undixi!
... continuada...https://www.amazon.it/dp/B082MSDT7Y
Nessun commento:
Posta un commento